Nang tiniris ang makulit na Kuto

Sinong mag aakala na ang dating patpating bata mula sa Gensan ay sisikat, maging tanyag na boksingero, hindi lang sa Pilipinas kundi sa buong mundo. Namulat at lumaki sa hirap, mula sa isang pamilya na hindi malaman kung saan sila kukuha ng pagkain para lamang maibsan ang kumakalam na sikmura.

Dating maglalako ng Donut at tinapay sa lansangan, na ang konting kinikita ay halos kulang pa sa isang kilong bigas para mai-saing at mapag saluhan nila ng kanyang Ina at mga kapatid.

Sa hindi isinasadyang pangyayari, nuong kanyang kabataan sa kanilang lugar, habang nanonood ng labanan ng boxing sa lugar na kanyang kinalakihan, sumali ang pobreng bata sa labanan, kanyang tinalo ang mas malaki sa kanya, siya ang nagwagi.

Ang kanyang napanalunan na 50 pesos ay pinambili ng bigas at ibang makakain, buong pagmamalaki na iniabot sa kanyang Ina.

Yun ang naging simula ng kanyang buhay boksingero, naging hudyat upang mangarap na maging tanyag, ang magkapera upang matulungan ang kanyang pamilya sa kanilang kahirapan.

Halos nasubaybayan ko rin lahat ang boxing career ni Manny, mula nung siya ay lumalaban pa lamang sa "blow by Blow" nung araw, madalas ko siyang napapanood sa TV noon, at hangang-hanga ako sa kanyang angking galing sa larangan ng boxing. Nagawa niyang patumbahin ang higit na mas malaki sa kanya.

Nasubaybayan ko rin lahat ang kanyang mga laban nuong nagsimula na siyang professional boxer, mula nuong patumbahin niya si Lebwada, hanggang inubos ang mga magigiting at magagaling na mexican boxer, na sina Antonio Barrera, Erick Morales, Juan manuel Marquez, David Diaz, Oscar dela hoya at iba pang Mexican fighter, at maging ang british slugger na si Ricky Hatton. Sa katunayan nga, sa dami na ng pinatumba ni Manny sa Mexican slugger at kapapanood ko bawat laban niya sa mga mexican fighter ay nakabisado ko na ang National Anthem ng Mexico. totoo yun.

At para sa update:

Talaga namang kinawawa ng husto ni Manny si Miguel Cotto, dinurog at tiniris ng bonggang-bongga at todong todo ang makulit na kuto. Mahusay talaga ang sandata ni manny, ang head & shoulder shampoo na kanyang iniindorso, yung mga balakubak hindi umubra sa kanya kuto pa kaya?   Gusto kong maawa kay cotto, pero wala eh, anong magagawa natin, ganyan talaga ang buhay sa boxing, may uuwing nakangiti at nakayukong talunan. Maliban sa dalawang beses na knockdown, durog at duguan ang mukha, nabali pa yata ang matangos niyang ilong.

Samantalang si Manny ay halos makinis pa ang retokeng Belo na kanyang mukha, maliban lang ang kanyang tenga na nagmistulang chicharong bulaklak na isinawsaw sa sukang paumbong. Parang naging butil ng Popcorn na nilamutak ng mga batang kalye.. At halos hindi niya tuloy marinig ang mga tanong sa kanya ng nag iinterview, nagka windang-windang ang kanyang katiting na nalalaman na Inglis. You know? i mean ahhh... yun na yun, buset.. ha ha ha.

Ang susunod nating pakaka abangan ngayon ay si Mommy D. (Aling Dionisia). Lalo na namang sisikat ang PacMom, dadami na muli ang kanyang offer na advertisment at tiyak na masusundan pa ang kanyang pelikula.

Palagay ko nga, abangan na lang natin ang kanyang solo launching Movie.