Kuwentong Tomador ng alak

Marami sa atin ay naiinis kapag nakabangga o nakasalubong ng isang lasing. pero dumating na ba sa puntong inalam natin kung bakit sila nagpapakalango sa alak? hindi pa diba? ano nga ba ang tunay na hangarin ng mga tomador na ito kung bakit ganon nalamang sila kahayok sa mga inuming nakakalasing?

Isang kaibigan ang nagpadala sakin ng text message noong mga nakaraang araw dala na rin siguro ng aking pag-imbita na lumabas ng mga katropa para magsaya,magpakalango sa alak at maisuka ang lahat. Ang laman ng mensahe niya ay mga dahilan ng mga lasinggero sa paglalasing. Sa una ay naisip ko na kalokohan lang ang laman nito kaya hindi ko muna binasa at hinayaan ko sa aking inbox. 

Nito lamang na-ipit muli ako sa trapiko sa Monumento malapit na sa bahay ko sa Potrero malabon, sa sobrang nakaka-inip ang mabigat na trapiko, naisipan kong magkalikot ng cellphone at magbura ng mga mensahe sa inbox. Bukod sa bored ako ay dahil na rin madaming unread messages na rin ang nasa inbox ko. Sa pagkakataong iyon ay nakita ko muli ang text message ng kaibigan ko na iyon, kaya binasa ko na rin. Laking gulat ko na hindi pala ito pawang kalokohan lamang bagkus ay mayroon itong lamang mga tunay na mensahe na nakakapanglusaw ng puso. 

Ito ang nakasaad sa Mensahe;

Sa tuwing hilo ako at umiikot ang mundo dulot ng espiritu ng nasa alak ay sana makatakas kahit panandalian lamang sa magulo kong mundo.

Sa tuwing tatawa sa kalokohan at biro ng tropa ay maitago ang lahat ng sakit at kalungutang naipon sa puso.

Sa tuwing iikot ang baso para sa tagay ay maisama na sana at matanggay ang mga problemang matagal ng gustong kumawala.

Sa tuwing pagkatapos ng tagay at pagbuga ng usok sa sigarilyo ay mailabas narin ang sama ng loob na matagal tiniis.

At sa tuwing itataas ang bote at ikakampay ay hindi sana mawalan ng kaibigang makakasangga sa kabiguan at kasaganahan.

OO nga naman, hindi lamang iniinom ang bote ng alak dahil sa wala lang, sa bawat gawain palang kaakibat ng pag-inom ay may mga paliwanag na kasama. hindi lang vices or bisyong maiituturing ang pag-inom kundi isang mala-spa na nakakapagparelax at nakakapagpawala ng mga dala-dalahin sa puso. kung hindi lang masama para sa kalusugan ang pag-inom ay marami narin sigurong pilipino ang nagpakalango sa alak dahil sa kahirapan, kabiguang makamit ang pangarap o kabiguang sa pag-ibig kaya lang kapag labis ang pag-inom magdudulot ito ng panibagong problema sayo dahil damay na dito ang kalusugan mo. kung kaya hindi dapat inaabuso ang mala-spa na pagrerelax na ito. ayan, unti-unti ng umuusad. sana katulad ng pag-usad na ito sa trapiko ay ang pag-usad natin sa mga problema natin sa buhay. 

hanggang sa muli kaibigan, dito sa Malabon, kwentuhan at inom tayo!