Pandesal

Masarap ang pandesal lalo na kapag bagong luto at mainit-init pa, tapos me palaman na keso, butter, mayonnaise, o di kaya ham, pero ang pinakagustong-gusto ko na ipalaman sa pandesal ay binating itlog. Ang sarap pa naman magbati ng itlog sa umaga, siyempre dahan-dahan muna saka mo bibilisan ng konti, banayad at sabayan mo ng konting sensation para feel mo ang pagbabati. Pag medyo malapit na sa rurok ng kasarapan, saka mo na ito ipiprito. Ayun! ang sarap ng pandesal na me palaman na Scrambled egg. ‘di ba mga ‘tsong at mga ‘tsang?

Ang Pandesal ay mainam na alternatibong almusal sa umaga. (of course! Alangan naman na almusal sa hapon). Kadalasan ang katambal nito’y isang tasa na kapeng mainit, o di kaya Milo o Ovaltine. … Teka nga muna, hindi ba ang Milo at Ovaltine ay pareho rin?..parehong lasang tsokolate rin yun eh! At saka sabi ng bunso ko, ang meaning daw ng Milo ay: Masarap Inumin Lasang Ovaltine… ayun! tumpak.. ang galeng talaga ng aking bunsong lalaki na grade-4, palibhasa pers honor palagi sa eskwelahan. Ipinagyayabang nga sa akin na syota na raw nya yung titser nyang sexy. Naunahan pa nya ako.

Back to pandesal – kaya nasabi kong mainam na alternatibong almusal, kasi mabilis na ihain sa hapag kainan, lalo na kapag malapit lang ang bakery sa inyong bahay, hindi mo na kelangan pang magluto ng almusal, medyo nakakatipid pa sa oras at sa budget nakakabusog din naman eh. Advisable din ito sa mga nagmamadaling pumasok sa opisina sa tuwing umaga lalo na kapag medyo gahol ka na sa oras, 2 hanngang 3 piraso ng pandesal sabay lagok ng mainit na kape, solve na, bawiin na lang pagdating ng tanghalian. At saka ang napapansin ko sa ngayon, lalo na sa kamaynilaan, tila hindi na uso ang magluto at maghain ng almusal, I mean yung normal na pagkaing almusal na may kanin o sinangag at ulam. Kunsabagay, sa hirap ng buhay sa ngayon, kelangan talagang magtipid, at humanap ng alternatibo, mabuti kung araw-araw ay naambunan tayo ng relief goods.

Ang Pandesal ay siyang pinaka popular na yeast raised bread sa ating bansa, kahit na marami ng nagsulputan na iba’t-ibang klase ng tinapay maging ito ma’y expensive o mura lang, ang pandesal pa rin ang pinakasikat, dahil kabilang na ito sa tradisyong pinoy, maging sa probinsiya man o sa siyudad. Kung tutuusin nga mas sikat pa nga ang pandesal sa mga probinsiya, nasaksihan ko ito mismo noong napadalaw ako muli sa probinsiya ng aking lolo. Sa madaling araw naririnig ko ang sigaw ng maglalako ng pandesal habang naglalakad sa kalsada, at kapag napapagawi ang maglalakong sumisigaw sa paanan ng bundok ay may kabuntot na eco ang kanyang sigaw. “Pandesal….sal….sal…sal…sal..”