Banko de semilya

Hindi ko alam kung papaano ko sisimulan ang artikulo na ito, hindi pa naman kasi ako nakaranas na mag-donate ng tamod, kasi nga parang wala naman yata ito dito sa ating bansa, kundi sa mga bansang mayayaman katulad sa europa, America at maging sa bansang Japan. Ewan ko lang kung meron nga dito sa Pilipinas, siguro huli lang ako sa balita o di kaya isa palang akong mangmang dahil madalas akong natutulog sa pansitan.

Muli, ako po’y nakiki-usap na sana’y huwag nyong seseyosohin ang kabulastugan na aking pinagsusulat sa pahinang ito, dahil ang lahat ng ito ay pawang kathang isip ko lamang, mangyari po eh, sobrang malikot lamang ang aking pag-iisip pagdating sa kalokohan, pagpapatwa at kabulastugan, kahit ano kasi ang nakikita ko, maging ito ma’y nasa loob at labas ng bahay nakakabuo ako ng isang kwento, at nagagawan ko rin ng tula. Siguro nga dito ako nabiyayaan ng pagka talentado, siguro nama’y lahat tayo ay may angking talento at talino sa mga magkakaibang bagay, ito’y komporme rin kung saan natin gagamitin.

Subalit gusto ko rin na ipaunawa hindi naman po ako taong nanakit sa kapwa o yung mga tipo ng tao na maton o siga sa mga kanto na nangungursunada at nambubogbog. Me puso, atay,isaw at balumbalunan din naman po ako tulad niyo, marunong din naman akong makisama at kasangga sa mga adhikain at hangarin lalo na yung mga nangangailangan ng tulong, handa po akong tumulong sa abot ng aking makakaya. Ang tanging hangad ko po lamang ay makapabigay saya at tuwa, maghahasik ng kaligayahan kung sino man ang gustong lumigaya, ngunit kung hindi naman po kayo natutuwa, eh.. magsarili ka na lang…just do your own self sevice.

Sinaliksik ko ang ibig sabihin ng “sperm bank”, sa kadahilanan na hindi naman ito pangkaraniwang napupuntahan at wala talaga akong kaalaman sa bagay na ito. At sa ating mga pinoy ay medyo me halong malisya at kiliti kung ito ay pagbabasehan. Malamang sa mga hospital o Klinica ay meron nito, medyo may katiyakan dahil meron din akong nabalitaan na ipinanganak ngunit ang tatay naman ay baog, kung kaya madalas siyang matukso na “putok sa buho” dahil basta-basta na lamang nailuwal sa mundo.

According to my research, (naks!), “A sperm bank or cryobank is a facility and stores human sperm mainly from sperm donors, primarily for the purpose of achieving pregnancies through third party reproduction, particularly by artificial insemination.”

Kung marami kayong magkakapatid at ang tatay mo naman ay baog, eh medyo mag-isip isip ka na, dahil kung hindi ka anak ng kumpare ng tatay mo, o yung tubero na taga ayos ng sirang tubo ng tambutso ng sasakyan nyo, eh baka naman produkto ka ng artificial insemination, medyo mas malupit ito dahil hindi mo alam kung sino ang tunay mong ama, sandmakmak ba naman ang hayok sa laman na nagparaos at isinalin lamang ang tamod sa maliit na botelya para ipreserba. Nakakapanduda nga naman ang magkakapatid na magkakaiba ang mukha, ugali at kulay, ang kinalabasan nun ay katulad ng tatak ng pabango na united colors of benetton.

Meron din yung mga matagal ng mag-asawa pero hindi pa sila nabibiyayaan ng anak, hindi makabuo dahil may diperensiya ang isa sa kanila, kapag ang  lalaki ang may diperensiya ay dumadaan sa pagsusuri ng sperm count, at kung sa babae naman ay inaayos ang matris baka sobrang mababa, kelangang maitaas ng bahagya, baka kulang sa bayo. May mga naniniwala rin sa mga himala, lalo na yung nagpapaniwala sa mga albularyo at manghuhula, yung mga iba naman ay pumupunta pa sa Obando kapag piyesta para magsayaw ng kuracha at hilingin sa mahal na patron na sila’y magkaanak.

Anuman ang dahilan ang pagkakabulwak ng Tiyanak dito sa mundo, lahat ay may dahilan at may kanya-kanyang misyon. Milyones na sperm cells ang nag-uunahan sa sinapupunan ng ina para maging tao at hindi naging tikbalang. At lahat ng nilalang na nabubuhay sa mundo, lahat ay V.I.P. “Very Important Person”, dahil tayo ang nabigyan ng pagkakataon at tayo ay pinagpala.